بھٹکل:20؍ڈسمبر (ایس او نیوز)یلاپور میں منعقدہونے والے اترکنڑا ضلع کنڑا ساہتیہ پریشد کے 21ویں ادبی اجلاس کے لئے متفقہ طورپرصدر منتخب ہوئے انجمن ڈگری کالج کے موظف پرنسپال ڈاکٹر سید ضمیر اللہ شریف کو ضلع کنڑا ساہتیہ پریشد کی جانب سے آج ان کے گھر پہنچ کر باقاعدہ اجلاس کے لئے مدعو کیا گیا۔ خیال رہے کہ ڈاکٹر ضمیر اللہ شریف پہلے ادیب ہیں جو بھٹکل سے ضلعی صدر کے طورپر منتخب ہوئے ہیں۔

اترکنڑا ضلع کنڑاساہتیہ پریشد کے ضلعی صدر اروند کرکی کوڑی اپنے ضلعی ممبران کے ساتھ ڈاکٹر ضمیر اللہ کے گھر پہنچ کر ان کی شال پوشی کرتے ہوئے انہیں اجلاس کی صدارت سنبھالنےکی دعوت دی۔ دعوت نامہ قبول کرتے ہوئے ڈاکٹر ضمیر اللہ نے کہاکہ اترکنڑا ضلع نے آج انہیں بہت بڑے احترام اور عزت سے نوازا ہے ۔ کنڑا زبان کے احسان کو بھولنا ممکن نہیں ہے ، کیونکہ اسی کنڑا زبان نے مجھے آج ایک اعلیٰ مقام عطا کیا ہے۔ اس موقع پر ضلع اعزازی خازن امیش منڈلی، اعزازی سکریٹری گنگادھر کولگی ، معاون سکریٹری ڈاکٹر سریش نائک، کمٹہ کے صدر شری دھر گوڈا ،بھاسکر نائک کمٹہ وغیرہ موجود تھے۔

بھٹکل کنڑا ساہتیہ پریشد کی جانب سے تہنیت : 21ویں ضلع کنڑا ادبی اجلاس کے صدر منتخب ہونے پر بھٹکل کنڑا ساہتیہ پریشد کی جانب سے ڈاکٹر ضمیر اللہ شریف کی تہنیت کی گئی ۔ اس موقع پر مقامی صدر گنگادھر نائک نے ڈاکٹر ضمیر اللہ کے ادبی خدمات کا تذکرہ کرتے ہوئے کنڑا زبان کی آبیاری میں ان کے اہم کردار پر روشنی ڈالی۔ پریشد کے خازن شری دھر شیٹھ، سنتوش آچاریہ ، سریش مرڈیشور ، نارائن نائک، اشوک نائک، وینکٹیش نائک ، کرشنا موگیر وغیرہ موجود تھے۔